توت توت عا فسلطين يا بيي خدني مشوار، إشلحني(ارميني) خلفك على الحمار يلي شارون كوهين نسيت توخده فرنسا، واربطني ببكلة وزنار، طبعا شارون كوهين اخذت حمير غزة على فرنسا وبلجيكا على اعتبار انه نفسية الحمير تعبانة، اما أكثر من مليوني بني آدم معلش نفسيتهم بتتحمل، طبعا لا في استاذ انشا ولا أستاذ تاريخ، اما المير بشير بطل مكوم فوقه ملك فرنساوي، تكوم فوقه ملك يهودي من أصول بولونية اسمه ميليكوفسكي، أستاذ التاريخ درسنا تواريخ حفظنا تواريخ إجا التاريخ طعمانا كف.
حمارنا كان متمرد ورغم انه تعبان مشي في بيي وفييّ لحتى وصلنا حاجز بيت حانون على حدود غزة، قام الامريكان واليهود وقفوني علحدود قال بدن هويتي، قلتلن إنَّ بيافا مخبايتها ستي، يا كلمة القلتها... تقسموا صفين، صف مدجج بصواريخ وصف يسأل وين؟ صرخت بفلسطين، قسموني نصين، نصي على الحدود ونصي بحضن ستي، ستي يامخبايّ مدري بأي بيت، هويتي ضبيها وخبيها بشي حيط بدهن يحرقوكي ويحرقوها ومن الدني يمحوكي ويمحوها.
وانا وبيي على شط البحر وحمارنا بغني للناس الصافين على الدور، شدوا الهمة، الهمة قوية حمار بينده عَل البحرية يا بحرية هيلا هيلا، شدوا الهمة الهمة قوية جرح بينده للحرية، طلع الغربي بيصفر تحت المينا الجوع بيحفر، طلع البحر بيبكي دمع بيشكي، القلب بيحكي، خلف السفينة قلعة نحنا، وساحات الدنيي مطارحنا، يا ريس هل المينا ابوعمار المقاطعة جايينا، صوت خان يونس نسمع ورفح للنخوة مقلع، صوت المنتدى نسمع وجماعات الخيانة نقلع.
وحمارنا بيوخد استراحة شفت ريتا وكان بين عيوني وبينها دبابة، والذي بيعرف ريتا، ينحني ويصلي لإلهٍ في العيون العسليَّة، للأسف ما عادت العيون عسلية ولا عاد عندها ضفيرة تغطي ساعدي لأنه مشغولة في قنص الأطفال المجوعين، منهم كفار بس الجوع كافر، ورغم ان
بيننا مليون عصفور وصوره ومواعيدُ كثيرة أطلقتْ عليها ناراً، فأرديتها أسيرة.
كهول، نساء، أطفال بعمر الزهور يتجمعون حول فرن مهجور لعل وعسى يخرج الفران من القبور، اخذني الحنين الى خبز امي وقهوة امي، اعشق عمري لان ريتا تريد ان تقتلني وعندها سأخجل من دمع امي، خذيني ان بعثت يوما وشاحا لهدبك وغطيني بعشب تعمد من طهر كعبك، عودة الى الفران ان خرج لن يجد الدقيق ليصنع للحالمين خبزا يشبه خبز امي وبما ان أمريكا وإسرائيل مجوعيننهم قصدا وقسراً فليس مهما ان يشبه الخبز خبز امي، ليس مهما فأي خبز يفي بالغرض، يسد الرمق وينجي من مسغبة.
كان بييّ بيسمع الاخبار على الترانزستور وفجأت قال مذيع الجزيرة سقطت سمراء غزة المسماة آلاء النجار حيةً، فالذي يفقد تسعة من اسرته يكون قد سقط حياً، فأنشدتها دون تفكير، في البال اغنية يا اخت عن بلدي، نامي لكتبها وشما على جسدي، كنا صغيرين والأشجار عالية وكنتِ أجمل من امي ومن بلدي، ورغم ان اهلي واهلك سيجوا كرم اللوز بالأشواك والكبد ورغم ذلك فالجنود جاءوا لا أدرى من اين.
في طريق العودة، حشد كبير ظننت انهم زبائن عربة الخضرة، فناديت حط الدبشة يا صلاح هجموا العالم، سندلي العربية وقرب ناولني الوزرة، عوافي يا معلم بقديش ال 105؟ بتماني بس الكيلو أهلاً بالدفيعة، حكي بسرك يا غالي بزات السعر ببيع حالي، ما تقلها عليِّ... ليك من لا صبحية، نعم ائمري يا ست، في حليب أطفال، هو الاسم الحركي للشواظ. يا صبي روح بيعها.
ومن كثر الزحمة تركت الهن العربية لان السوق منو متوقف على العربية، ترامب ببعت صواريخ تضرب صهاريج المي، سموترش بشكل لجان تحمل كل الغزاوية برا القطاع وان ما زبط برا الكرة الأرضية، حميحاي بدو يبعت قنبلة نووية، الاهبل مَنو عارف انه غزة محمية، وروبيو بدو يبني الدولة الفلسطينية في فرنسا وهيك بنصير فرنساوية، ومايك هكابي الي سرق أراضي الاباتشي بوزع على العالم شهادات هوية، ساعر امه أرجنتينيّة وبقول ليش نقبل دولة فلسطينية.
مارسيل اسمي، وهويتي عربية، فلسطين بلدي، ولإنو اصلي لبناني فانا من اختار وطنه ، إني اخترتك يا وطني حباً وطواعية، إني اخترتك يا وطني سراً وعلانية، فليتنكر لي زمني ما دمت ستذكرني يا وطني الرائع يا وطني فانت غي قلبي دائم الخضرة وإن بان في عيني الأسى، انا جئت في زمن الجزر لكن زمن المد قادم، عندها ستكون جهنم مصير كيان الاحتلال الاحلالي، حبيبي مارسيل، كلها فترة وهترجع معمرة ومبنية بسواعد أهلها واحرار العالم والأمة العربية، اما مشروع الشرق الأوسط الصهيوني فيبلوه ويشربوا من نقيعه ميّه، بدي اترجاك تغنيلهم انه فلسطين عربية وما ضل غير شوي على الحرية.